ភ្នំពេញ៖ រដ្ឋមន្ត្រីប្រតិភូអមនាយករដ្ឋមន្ត្រីកម្ពុជា លោក សូ ណារ៉ូ បានថ្លែងឱ្យដឹងថា ក្រោយនាយករដ្ឋមន្ត្រីកម្ពុយ សម្តេចមហាបវរធិបតី ហ៊ុន ម៉ាណែត អញ្ជើញថ្លែងសុន្ទរកថានៅក្នុងកិច្ចប្រជុំកំពូលធុរកិច្ច និងវិនិយោគអាស៊ាន ឆ្នាំ២០២៣ នៅទីក្រុងហ្សាការតា កាលពីនាល្ងាចថ្ងៃទី៤ ខែកញ្ញា ឆ្នាំ២០២៣ ទទួលបានការចាប់អារម្មណ៍ពីជំនួញបរទេសច្រើនដែលមានចំណងចង់មកវិនិយោគនៅកម្ពុជា។

លោក សូ ណារ៉ូ បានថ្លែងនៅក្នុងសន្និសីទសារព័ត៌មានកាលពីយប់ថ្ងៃទី៨ ខែកញ្ញា ក្រោយពីនាយករដ្ឋមន្ត្រីកម្ពុជា សម្តេចមហាធិបតី ហ៊ុន ម៉ាណែត វិលត្រឡប់មកកម្ពុជាវិញថា៖ «បន្ទាប់ពីសម្តេចបានថ្លែងការជាភាសាអង់គ្លេស ហើយបានលើកអំពីកិច្ចការធុរកិច្ច ភាពចាំបាច់របស់អាស៊ាន ក៏ដូចជាការលើកទឹកចិត្តឱ្យមានការអញ្ជើញមកវិនិយោគនៅកម្ពុជា អ្នកឧកញ៉ា គិត ម៉េង បានជំរាបថា ក្នុងសាលដែលមានមនុស្ស ៧០០នាក់សុទ្ធតែអ្នករកស៊ីធំៗ និងតំណាងក្រុមហ៊ុនធំៗ គឺចូលរួមចាប់អារម្មណ៍ និងយល់ច្រើនអំពីកម្ពុជាដែលជាភាពស្រស់ញញឹមរបស់នាយករដ្ឋមន្ត្រី»។

បើតាមលោក សូ ណារ៉ូ នាយករដ្ឋមន្ត្រីកម្ពុជាពិតជាមានការសោកស្តាយដែលមិនមានពេលវេលាគ្រប់គ្រាន់ដើម្បីរាក់ទាក់ដល់អ្នកជំនួញបរទេសទាំងនោះ ដោយសារសម្តេចធិបតីត្រូវចូលរួមកិច្ចប្រជុំជាបន្តបន្ទាប់។

លោក សូ ណារ៉ូ បានគូសបញ្ជាក់ទៀតថា អ្នកឧកញ៉ា គិត ម៉េង បានជំរាបជូនសម្តេចធិបតីថា មានអ្នកវិនិយោគិនបរទេសជាច្រើនដែលចង់មកស្គាល់កម្ពុជា ដោយសម្តេចធិបតីបានគូសបញ្ជាក់ថានឹងបង្កគ្រប់លក្ខណៈងាយស្រួលដើម្បីស្វាគមន៍ដល់អ្នកវិនិយោគិនកាន់តែច្រើនបន្ថែមទៀត។

លោកបានបន្ថែមទៀតថា មិនតែប៉ុណ្ណោះ ចំពោះផ្នែកសេដ្ឋកិច្ចវិញ កម្ពុជាក៏ទទួលបានសមិទ្ធផលគាប់ប្រសើរផងដែរ ដោយប្រទេសឥណ្ឌូណេស៊ីបានឯកភាពនាំចូលអង្ករពីកម្ពុជាចំនួន ២៥ម៉ឺនតោនក្នុងមួយ១ឆ្នាំ។ ក្រៅពីនេះ ក៏មានប្រទេសហ្វីលីពីន និងម៉ាឡេស៊ី ក៏បានគិតគូរអំពីគម្រោងក្នុងការនាំចូលអង្ករពីកម្ពុជាផងដែរ៕